一年一度媽媽節，食飯慶祝是例牌事，但除了講句「母親節快樂」，為人子女其實又了解母親幾多呢？今次記者就走入人群，看看後生仔女對母親用機習慣了解多少！
問到母親使用甚麼手機，大部人都答得出，只有少部分連牌子與型號也說不出，實在抵打！至於阿媽最常用手機做啲咩，原來不是Whatsapp或淘寶，而是玩陳年遊戲《Candy Crush》，部分媽媽更玩到廢寢忘餐，要子女反勸早點休息，真是估佢唔到！
煲劇是母親另一至愛手機「活動」，當中又以韓劇為主流，喜愛明星離不開靚仔，長腿ＯOppa李敏鎬就最受歡迎。上網慢、容量不足是媽媽常遇到的手機問題，大部分子女也會耐心教導，只是被問得多也會感到厭煩。長者喜愛向子女發送長輩圖，可惜他們大多認為無聊，甚至是廢話，實在浪費了母親的一番心意呢！
向母親說「我愛你」甚難啟齒，但即席經Whatsapp發送「愛意」予母親的話，卻大部分被訪者都願意立即行動。其實大家都是口硬心軟，今個母親節，不要再怕醜，一於齊齊大大聲說句「母親節快樂」啦！
本文來源：http://hk.on.cc/hk/bkn/cnt/lifestyle/20170514/bkn-20170514130018123-0514_00982_001.html