雖然已經32歲，而且今屆演出唔夠以往Sharp醒，不過C朗依然係皇馬頭號球星。呢位葡萄牙天王，於隊中有至高焦上地位，加上季尾於歐聯大爆發，當然有超勁討價還價嘅能力。雖然皇馬本季有機會成歐洲雙冠王，但球隊部份正選年紀唔細，換血事在必行，據西班牙媒體報道，C朗已頒布「收購八道戒條」，其中包括嚴禁買入夏薩特或基沙文，如果皇馬一意孤行，C朗就會即時鬆人！
C朗一向自視極高，對皇馬未來方向有嚴格規定，如果覺得唔啱心水，佢一定會出聲，並且會以離隊作為威脅。據西班牙媒體Diario Gol報道，C朗希望皇馬今夏大規模換血，佢對現時門將、中堅、中場及前鋒都好有意見，認為隊友基羅拿華斯、拿祖費南迪斯、華拉尼、賓施馬都唔夠班，希望有更佳球員幫助自己爭標。另外，為保頭號球星地位，嚴禁「銀河艦隊」買入夏薩特同基沙文，睇到C朗有幾唯我獨尊。
C朗的八道收購戒條
1.踢走門將基羅拿華斯
2.收購迪基亞或泰拔高圖爾斯
3.比比季尾離隊，華拉尼同拿祖費南迪斯唔夠班，一定要為沙治奧拉莫斯收購新拍檔
4.自感年事已高，要收購新中場鎖匙人幫自己入波，莫迪歷一個唔夠
5.視摩納哥中場、葡萄牙國家隊拍檔貝拿度施華為理想人選
6.要踢走賓施馬，希望同一個把握力更佳嘅射手做拍擋
7.准許收購奧巴美揚、保羅戴巴拿、摩納哥射手基利安麥巴比，或些路迪前鋒穆沙迪比利
8.絕對唔准買夏薩特或基沙文，以力保頭號球星之位，如果皇馬唔聽，就即時離隊
東網體育同你追實體壇每個精彩時刻！
http://bit.ly/2ecTF2A
本文來源：http://hk.on.cc/hk/bkn/cnt/sport/20170513/bkn-20170513191529281-0513_00882_001.html