懲教署署長邱子昭將於下個月退休，臨別秋波，近月頻頻到各懲教院所巡視，位於赤柱的懲教署職員訓練院大門，日前就掛上印有邱Sir圖像的大型橫額，上面更寫上以邱Sir中文名字創作的對聯「君子博物、功昭日月」，引起職員關注，有職員認為是有人想擦鞋；不過，好可惜擦錯鞋，一來邱Sir事前全不知情，二來都唔鼓勵同事咁做，絕無搞個人崇拜，而據知，呢張橫額最後消失咗。
懲教署發言人回應話，署長須按法例定期巡視同視察所有懲教設施，傳統上，署長會在退休前巡視，仲同職員合照留念，現任署長亦都按照呢個傳統，以不影響運作為大前提，由今年6月初至今，共巡視29個設施中的11個。
發言人話，今次署長到職員訓練院巡視，之後仲主持知識管理系統啟動禮，期間亦有同事出席；知識管理系統有助提升個人學習，之後署長亦有同職員在草地上大合照，但當時就無任何背景設置，合照的人就包括職員、正在受訓學員、教官同退休人員。
※更多政經猛料、秘聞，請關注政Whats噏fb：
https://goo.gl/ndFQNz
本文來源：http://hk.on.cc/hk/bkn/cnt/news/20170706/bkn-20170706000026444-0706_00822_001.html