英超 A山神級助攻 阿仙奴劏海鷗

即上英超刨績王:http://win.on.cc/epl 

阿仙奴今季繼續主強客弱,作客不勝兼大敗利物浦,但每次踢走雲格嘅噓聲響徹酋長球場後,就會好快畀主場贏波嘅歡呼聲蓋過。兵工廠主場持續強勢近5戰贏晒,如果連上季計,球隊於主場已經9連勝,今晚再下一城輕取白禮頓,將主勝紀錄增到10場。今仗兵工廠有蒙利爾及伊禾比建功,但最勁都係A山貢獻一個神級助攻,完全反映呢位智利神鋒級數。

為咗延續主場好表現,領隊雲格上仗歐聯作客巴迪收起多名主力,包括艾朗藍斯同阿歷斯山齊士,畀佢哋留喺英國抖抖,呢場面對白禮頓兩人都正選上陣。此外,兵工廠新兵拿卡錫迪加盟以嚟絕對交到貨,英超開咧已經連續3仗主場入波,追平咗由馬活特喺1988年創下嘅紀錄,呢仗法國前鋒今仗表現亦佳,開波1分鐘左右,就喺禁區外開弓勁射可惜中柱彈出。

今仗早段,阿仙奴完全控制戰局,大部分時間壓住對手嚟攻,仲多番威脅對手大門,終於係比賽第17分鐘,靠罰球機會由蒙利爾射入,半場以1:0領先對手。換邊後兵工廠繼續圍攻,仲係53分鐘一次禁區頂絕妙配合,由阿歷斯山齊士喺人群當中,出後腳助攻伊禾比,將紀錄鎖定為2:0,兵工廠主場威力堅勁!

東網體育同你追實體壇每個精彩時刻!
http://bit.ly/2ecTF2A 


本文來源:http://hk.on.cc/hk/bkn/cnt/sport/20171001/bkn-20171001205242608-1001_00882_001.html