西甲 閉門作賽 碧基:好難受

即上英超刨績王:http://win.on.cc/epl

加泰隆尼亞近日進行獨立公投,事件引發連環衝突搞到巴塞隆拿周日,喺西甲主場對拉斯彭馬斯場波要閉門作賽。巴塞賽後雖以3球大炒對手,但係教練華維爾迪、中堅碧基都話喺一個空空如也嘅魯營作賽好難受。

地上最強原本希望可以延期再賽,但係拉斯彭馬斯同西甲賽會堅持要如期開波,巴塞眾將喺更衣室同職員了解事年之後,決定出場比賽。雖然大勝3球,但係公開撐加獨嘅碧基賽後都係唔多高興:「呢場可以話係我職業生涯最差嘅體會。呢一日對加泰隆尼亞嘅每一個家庭都係好難過嘅一日,我哋嘅抗議冇任何暴力成份,但係全世界都睇到發生咩事。」

呢位西班牙國腳又話:「會方希望比賽延期,當職員嚟到更衣室個時,大家討論過後先決定比賽。」巴塞教頭華維爾迪都話公投事件引發嘅警民衝突,令到球員上陣好緊張,影響咗上半場嘅表現。呢位今季先上任嘅教頭又話,現況好複雜,自己唔係政治人物,唔想為事件作評論,只希望可以盡快回復和平。佢又透露會方想為加泰隆尼亞人民做啲嘢,但係多方壓力之下先會決定作賽。

東網體育同你追實體壇每個精彩時刻!
http://bit.ly/2ecTF2A


本文來源:http://hk.on.cc/hk/bkn/cnt/sport/20171002/bkn-20171002180918693-1002_00882_001.html