推落路軌:首次元朗開工 遇襲娣姐魂飛西天

任職清潔工的「娣姐」(59歲)今晨在輕鐵元朗總站無辜遇襲,在醫院經治理後,接受東網記者訪問。娣姐透露,她與胞姊同住屯門區,在一間清潔公司工作,主要到屯門及天水圍的輕鐵站清潔車廂及月台,今日首次前往元朗總站開工。事發時,娣姐剛完成工作,與月台對面一位新相識的工友打招呼,她形容:「講唔夠兩句,突然有人喺後面推我,我都反應唔嚟!」她當場飛墮路軌,下巴撞向碎石爆裂,左手撼中路軌骨折。

回想當時情況,娣姐猶有餘悸稱:「我個魂魄都飛咗上西天!」她指當時疼痛難當,感到天旋地轉,只隱約看到月台上有一名綠衫男子,其後有2名好心人跑落路軌把她扶起,到月台旁邊等候救護車,期間未有再想何以遇襲,只希望救護車盡快趕到。

經送院診治後,娣姐證實下巴受傷需縫6針,左手則要打石膏,候診及接受治理共約6小時,醫生指毋須留院,故她傍晚已回家休息。她坦言,幸好當時無車埋站,算是不幸中大幸,但現時她亦難以進食,表示:「個口仲好痛,好難咬嘢,呢幾日都要食粥。」而且其左手無法抬起,日常生活亦難以自理,她又嘆道:「唔知幾時先好得返,有排都返唔到工。」幸好娣姐有胞姊照顧,公司亦著她安心休息,其餘事情公司會代為處理。娣姐又稱,現時丈夫在內地,她直言:「唔敢講畀佢聽住,怕佢擔心,等下巴拆咗線先。」

另外,娣姐亦已向警方錄取初步口供,她指:「差人問我有冇同人結怨,我本地街坊都唔識多個啦,點會識唔知咩國家嘅人!」她坦言與對方毫不相識,亦從未見過他,難料為何會向她落手,認為此類事件防不勝防,直言:「無計㗎,佢要無端端推你,你都好難防範。」


本文來源:http://hk.on.cc/hk/bkn/cnt/news/20171021/bkn-20171021183230142-1021_00822_001.html