【利市直擊】紅軍創會125周年 球迷瘋搶新貨

作者:Qearl    發表日期:2017-06-01 19:28:03

英超今周煞科,相信各位利物浦及阿仙奴球迷都「坐唔安、瞓唔樂」,皆因兩隊仍為第4位爭持激烈,紅軍只要喺主場擊敗已篤定降班嘅米杜士堡,即可穩奪歐聯資格!大戰前夕,本報記者親身去到利物浦視察賽前情況,發現當地「利迷」喺周五(5月19日)全新主場波衫開售第1日,已經仆到去搶衫,至於限量嘅125周年版波鞋,更加係一開賣已經被搶購一空,相比起「拍烏蠅」嘅愛華頓精品店「Everton Two」,好似舖名咁講,利物浦的確人氣爆燈,係真正嘅「利市一哥」!

小記星期五去到位於利物浦市中心大型購物中心Liverpool One嘅兩層專門店,見到門外櫥窗已經展示緊全新嘅主客波衫,其中紅衫白領嘅主場球衣玩復刻,參照紅軍輝煌歲月70年代嘅經典款,唔少利迷都「直豎姆指」,公開發售第1日已經吸引當地利迷迫滿專門店買衫,店方亦都喺2樓整咗成面「波衫牆」,無論主場作客,大人裝定童裝、有印字定無印字,全部任揀。淨賣波衫當然唔夠啦,新波衫一出,同款嘅坐墊、啤啤熊、鎖匙扣、BB口水肩都悉數面世,實行男女老幼通殺,係掂嘅。

今年適逢利物浦球會創立125周年,球會梗係把握機出推出大量精品,最矚目係同球衣贊助商New Balance合作推出嘅限量版波鞋,網上預訂一出,男裝就被「秒殺」,小記星期五下午去到Liverpool One分店亦都唔見呢對鞋影蹤,真心失望!不過同小記一樣向隅嘅球迷都唔使失望,仲有好多其他125周年精品,其中一樣就係今日對米杜士堡場波嘅場刊,封面打正旗號寫住「125th」,作為利迷,一定要擁有。

相比起利物浦專門店嘅人山人海,隔離嘅同市死敵愛華頓專門店Everton Two,入面除咗店員之外一個人都冇,相映成趣,莫非真係好似舖名反映咁,無論喺成績定人氣方面,歷史更加悠久嘅愛華頓都要屈居喺紅軍之後?順帶一提,球迷買紀念品,除咗可以去官方專門店真金白銀撐愛隊,仲可以去到一啲「非官方」嘅攤位,喺Liverpool One附近就有一檔,售賣大量有唔同球員、現任或前任領隊頭像同名嘅頙巾,售價7至10英鎊,仲有大量襟章等等,比賽當日相信晏菲路球場門口會有更多選擇。


本文来源:http://hk.on.cc/hk/bkn/cnt/sport/20170520/bkn-20170520080144354-0520_00882_001.html

本文固定鏈接: http://www.hkcarpet.com/9637.html
轉載請注明:Qearl 2017-06-01 19:28:03 于 香港國際時事通 發表

上一篇: :下一篇
返回頂部